Bllokimi i llogarive për aksionerët, qeveria bën kthesë pas presionit të biznesit

Ministria e Financave ka kthyer mbrapsht udhëzimin, që sanksiononte bllokimin e llogarive bankare të administratorëve e ortakëve. Sipas variantit të hedhur për diskutim, Tatimet merrnin të drejtën për të bllokuar llogaritë edhe pa pasur në dorë vendimin e gjykatës, udhëzim ky që u cilësua si antikushtetues nga Biznesi. 

Qeveria ka vendosur të tërhiqet nga udhëzimi që i jepte kompetencë të plotë administratës tatimore që të kontrollojë dhe bllokojë llogaritë bankare të kompanive. Shoqatat e Biznesit dhe Dhomat e Tregtisë kundërshtuan në bllok nenin  që sanksiononte bllokimin e llogarive bankare të ortakëve, aksionerëve dhe administratorëve, Ministria e Financave vendosi të tërhiqet dhe do të përmirësojë pikën 90.1 të tij. 

Vetë dikasteri i tha Euronews Albania, se në vijim do të dalë me një sqarim për rastin. Unioni i Dhomave të Tregtisë dhe Industrisë, dy ditë më parë i drejtoi një  letër  ministres së Financave, Anila Denaj, ku shkruhej se se udhëzimi nr.44 krijonte arbitraritet dhe pasiguri në klimën e biznesit për investitorët e huaj.

Bizneset e kanë konsideruar të papranueshëm cenimin e llogarive personale të adminstratorit, ortakut dhe aksionarit të kompanisë lidhur me detyrimin tatimor të kompanisë pa patur një vendim të formës së prerë të Gjykatës i cili ngarkon me përgjegjësi individuale për pagesën e detyrimeve tatimore.

Në udhëzimin e ndryshuar përcaktohej se nëse pas zbatimit të masave shtrënguese, duke përfshirë sekuestrimin dhe shitjen e pasurive, subjektet nuk shlyejnë detyrimet, shuma e papaguar i transferohet ortakut, aksionerit dhe administratorit.

Mospagimi i detyrimit në kohë, sipas procedurave të ndryshuara nga Ministria e Financave, penalizonte ortakun dhe administratorin e kompanisë, të cilëve do t’u bllokohen llogaritë dhe depozitat bankare.