“Ministrja përdor helikopterin ushtarak për fushatë”, PD: Është shkelur ligji

Ish-deputetja e Partisë Demokratike, Albana Vokshi në një deklaratë të bërë për mediat thotë se kryeministri po përpiqet ta mbulojë me propagandë shkeljen e ligjit nga ministrja e Mbrojtjes, Olta Xhaçka. PD e akuzon këtë të fundit se ka përdorur një helikopter të Ushtrisë për takime elektorale të Partisë Socialiste. Sipas PD-së, znj. Xhaçka ka udhëtuar nga Tirana për në Dibër me mjet e Forcave të Armatosura.

“48 orët e fundit qytetarët kanë ndjekur propagandën e shfrenuar të kryeministrit, i cili ka folur për gjithçka, por jo për shkeljen e rëndë të ligjit nga Ministrja e tij e Mbrojtjes. Partia Demokratike publikoi pak ditë me parë pamje të mbërritjes së Olta Xhaçkës në Dibër me helikopterin ushtarak për një takim të Partisë Socialiste atje, ku është e deleguar.

Si reagoi Ministrja e Mbrojtjes? Fillimisht heshti, por kur presioni ynë dhe i publikut u rrit, ajo doli dhe mashtroi duke thënë se nuk e kishte përdorur helikopterin. E vërteta është se Olta Xhaçka ka udhëtuar me helikopterin e Ministrisë së Mbrojtjes ditën e premte. Helikopteri e ka çuar në Dibër, më pas është kthyer në Tiranë.

Brenda të njëjtës ditë, ka shkuar ta marrë sërish drejtuesen politike të qarkut të Dibrës për Partinë Socialiste, pasi ka bërë takime me strukturat e partisë, për qëllimi politike, elektorale, takime që nuk përputhen me përmbushjen e detyrave funksionale të saj”, ka deklaruar znj. Vokshi.