Emigracioni “shteron” Shqipërinë, Gjirokastra dhe Vlora më të prekurat

Emigracioni është shndërruar në një fenomen shqetësues për Shqipërinë teksa po shteron forcën e punës dhe zhvillimin e qëndrueshëm të vendit.

Sipas të dhënave të INSTAT, qarqet e Lezhës, Elbasanit dhe Beratit kanë emigracionin më të lartë ndër 12 qarqet e tjera të vendit në raport me popullsinë.

Në rastin e qarkut të Dibrës, Gjirokastrës dhe Kukësit, gjatë vitit 2018, si migrimi i jashtëm ashtu edhe lëvizjet e brendshme ndikuan në zvogëlimin e numrit të popullsisë së tyre.

INSTAT raporton se popullsia banuese e të gjitha qarqeve të vendit është në mënyrë domethënëse më e vogël se popullsia e regjistruar në regjistrat e gjendjes civile. 

Të dhënat tregojnë se qarku i Gjirokastrës dhe ai i Vlorës janë dy qarqet e vetme ku popullsia banuese është më pak se gjysma e popullsisë së regjistruar, përkatësisht me 41,1 % dhe 49,0 %.