Vidhte me dhunë bizhuteritë e qytetarëve, arrestohet grabitësi serial në Durrës

Një 26-vjeçar i shpallur në kërkim si bashkëautor i disa vjedhjeve është arrestuar nga policia e Durrësit këtë të enjte.

26-vjeçari u shpall në kërkim në kuadër të operacionit “Seriali”, të zhvilluar 5 ditë më parë, ku u zbardhën 3 vjedhje me dhunë të sendeve personale, si dhe u kap në flagrancë bashkëpunëtori i tij.

Materialet procedurale në ngarkim të tij i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.

“Shërbimet e Komisariatit të Policisë Durrës, si rezultat i veprimeve të shpejta operacionale, të kryera në vijim të operacionit policor të koduar “Seriali”, operacion i cili zbardhi 3 raste të vjedhjeve me dhunë, të kryera gjatë këtij muaji, kapën dhe ndaluan shtetasin e shpallur në kërkim:

– M. H., 26 vjeç, banues në Durrës.

Nga veprimet hetimore, dyshohet se 26-vjeçari dhe shtetasi P. C. (i arrestuar më datë 06.05.2023, gjatë këtij operacioni) janë bashkautorë të vjedhjeve me dhunë të një varëse floriri, një unaze dhe një celulari, në pronësi të 3 shtetasve të ndryshëm”, thuhet në njoftimin e policisë.

LEXONI GJITHASHTU:

• Droni zbulon parcelën me 500 rrënjë kanabis në Vaun e Dejës
• Aksident me vdekje në rrugën Sarandë-Borsh