Protesta në Moldavi kundër projektligjit të kalimit të pushtetit tek parlamenti

Me mijëra qytetarë kanë protestuar në Moldavi duke kërkuar dorëheqjen e qeverisë dhe zgjedhje të parakohshme parlamentare. Kjo pasi qeveria ka miratuar një projektligj për kalimin e kontrollit të pushtetit nga presidenti tek parlamenti.

“Ata duan që ta vendosin pushtetin në duart e një personi të vetëm dhe ta shndërrojnë atë në një diktator, duke na kthyer në skllevër,” – tha Vladimir Dinica, protestues.

“Ndërkohë që Dodon ishte president, ai kërkoi që pushteti të kalonte nga parlamenti tek ai. Tani që humbi zgjedhjet dhe vendi ka një president të re, e cila është në anën e qytetarëve, ata duan t’i presin krahët dhe ta privojnë atë nga gati i tërë pushteti,” – u shpreh Mihail Gorban, një tjetër protestues.

Muajin e kaluar Moldavia zgjodhi si kkryetare shteti kandidaten Maia Sandu. Megjithatë kundërshtari i saj Igor Dodon dhe antarët e parlamentit që janë mbështetës të ish-presidentit, nuk e pranojnë këtë humbje.

Rreth 20.000 protestues mbështetës të presidentit që pritet të marrë pushtetin janë grumbulluar përpara godinës së parlamentit duke thënë se “nuk do të dorëzohemi”.