SHBA ndihmon Shqipërinë me pajisje mbrojtëse kundër Covid-19

Shtetet e Bashkuar të Amerikës kanë dhuruar një tjetër ndihmë për Shqipërinë në kushtet kur numrat e të infektuarve me Covid-19 janë në rritje. Ambasada e Shteteve të Bashkuara në Tiranë, thotë se kësaj here në vëmendje janë institucionet e vuajtjes së dënimit, apo siç njihet ndryshe si sistemi penitenciar.

“Shtetet e Bashkuara me kënaqësi ofrojnë ndihmë për të mbajtur sistemin penitenciar shqiptar të sigurt gjatë kësaj kohe të vështirë të COVID. Ambasadorja Kim dhe programi i Departamentit të Shtetit i Çështjeve Ndërkombëtare të Drogës dhe Zbatimit të Ligjit, dorëzuan pajisje personale mbrojtëse në Drejtorinë e Përgjithshme të Burgjeve”, thekson ambasada e SHBA.

Ndihmat konsistojnë në pajisje personale mbrojtëse kundër Covid-19, me qëllim që këto institucione të mbrohen nga infektimi i mundshëm. 

“Pajisjet, të cilat përfshijnë maska mbrojtëse dhe dezifektant duarsh, do të ndihmojnë Drejtorinë e Përgjithshme të Burgjeve të sigurojë shëndetin dhe sigurinë e të burgosurve dhe personelit të burgjeve gjatë pandemisë COVID-19”, shton ambasada”  shton ambasada.

Shtetet e Bashkuara të Amerikës më parë kanë ndihmuar Shqipërinë me respiratorë për t’iu ardhur në ndihmë pacientëve, të cilët kanë nevojë për shkak të infektimit nga Covid-19.