Kërcim në kohën e pandemisë, koreografia e këngës afrikane u riprodhua në mbarë globin

Në një kohë kur arti dhe muzika janë prekur ashtu si çdo aspekt i jetës nga pandemia e COVID-19, një grup kërcimi afrikan ka sjellë një “trend” që u përhap me shpejtësi në të gjithë globin. 

Si mund të shndërrohet në virale një koreografi e një kënge në mesin e një pandemie, aq sa të përfshihen stafet e kompanive ajrore, stafet mjekësore të spitaleve dhe të performohet edhe nga një orkestër ndërkombëtare?

Për të marrë përgjigje, duhet të shkojmë pas, në shkurt të këtij viti, kur grupi i kërcimit nga Angola, “Fenomenos do Semba” vendosi të festonte në një mënyrë të veçantë 5 vjetorin e krijimit.

Një festë spontane, pjata me ushqim në dorë, një detaj ky qe u ripërsërit, dhe lëvizje të frymëzuara nga i ashtuquajturi “kërcim familjar”.

Gjithçka nën tingujt e hitit Afrikano Jugor të quajtur “Jerusalema”.

“Shkuam të shihnim tekstin dhe përkonte ekzaktësisht me çfarë po përjetonim në atë moment. Po shijonim përvjetorin, por pa pasur gati asgjë.

Kështu që muzika na motivoi, në një mënyrë që mund të vazhdonim, edhe pa patur mundësinë të festonim,” – tha Adilson Maíza, koreograf i “Fenómenos do Semba“.

14 milionë shikime më pas në YouTube, më e pakta që mund të themi është se mesazhi u përcoll.

“Ajo që donim të tregonim në atë video është lumturia, është thjeshtësia e afrikanëve, sidomos në Angola. Donim të tregonim se është e mundur të jesh i lumtur edhe pa patur asgjë, dhe në kohët e vështira që po jetojmë, me COVID-19,” – tha Maíza.