Humb betejën me COVID-19 mjeku vlonjat

Covid shënon një tjetër humbje në bluzat e bardha në Vlorë.

Mësohet se ka humbur jetën pas infektimit gjinekologu 47-vjeçar, Leonard Kamberi.

Mjeku ishte i shtruar prej 2 javësh në spital, por nuk mundi të fitonte betejën me sëmundjen e rëndë. 

Për humbjen e mjekut ka reaguar nëpërmjet një statusi në Facebook edhe kryetari i bashkisë së Vlorës, Dritan Leli.

“Nard Kamberi, një tjetër mjek i talentuar dhe mik i rrallë, na u largua sot të gjithëve duke lënë vetëm bashkëshorten, Erindën,  që pas pak ditësh pret të bëhet nënë për herë të parë, me fëmijën që prisnin me dashuri pas kaq shumë kohësh. Të prehesh në paqe Nardi! Do na mungosh shumë”, shkruan Leli.

Humbja e mjekut shënoi humbjen e dytë brenda dy ditëve në radhët e personaliteteve të Vlorë, pasi ditën e djeshme humbi jetën prej Covid 19 dhe pedagogia Dafina Brokaj.

Në këto nëntë muaj të pandemisë së COVID-19 kanë humbur jetën rreth 20 mjekë.