Shfaqej si investitore dhe premtonte apartamente me klering, arrestohet 49-vjeçarja

Adelina Haxhiraj është 49-vjeçarja, e cila është arrestuar nga policia pasi akuzohet për mashtrim të qytetarëve, pasi shfaqen si investitore.

Sipas policisë, Haxhiraj e cila ka qenë e dënuar edhe më parë për të njëjtën vepër penale, i merrte qytetarëve shuma të konsiderueshme parash duke iu premtuar apartamente me klering apo ndërrim.

Uniformat blu sqarojnë se ajo ka përfituar 200 milionë lekë të vjetra nga personat që kanë rënë pre e mashtrimit se do të merrnin apartamente, njësi shërbimi hekur për ndërtim pallatesh apo pajisje me kabina të tensionit të lartë.

“Seksioni për Krimin Ekonomik dhe Financiar, në bashkëpunim me Prokurorinë e Rrethit Gjyqësor Tiranë, nisur nga kallëzimet e bëra nga disa qytetarë të ndryshëm për një shtetase e cila hiqej si investitore duke iu marrë shuma të konsiderushme parash shtetasve të ndryshëm duke ju premtuar klering/ ndërrim apartamente, njësi shërbimi, ka organizuar dhe finalizuar operacionin policor të koduar “Investitori”, si rezultat i të cilit u ndalua shtetasja:  A.H., 49 vjeçe, e dënuar më parë për veprën penale “Mashtrimi.  

Kjo shtetase në rolin e investitores iu ka marrë shuma të konsiderushme rreth 200 milion lekë të vjetra shtetasve të ndryshëm duke iu premtuar si klering/ndërrim apartamente, njësi shërbimi, hekur në funksion të ndërtimeve të pallateve apo paisje me gabina elektrike të tensionit të lartë në funksion të pallateve:, thuhet në njoftimin e Policisë.

Materialet i kaluan Prokurorisë së Rrethit Gjyqësor Tiranë dhe mbi 49-vjeçaren rëndojnë veprat penale “Mashtrimi“,“Falsifikimi i dokumentave”, “Fshehja e të ardhurave” dhe “Mospagimi i taksave dhe tatimeve”.