Plagosja e shefit të Rendit në Korçë, procedohen 9 protestues

Policia e Korçës ka proceduar 9 persona, të cilët ishin pjesë e protestës së djeshme për vrasjen e 25-vjeçarit Klodian Rasha.

Sipas policisë 9 personat kanë hedhur sende të forta në drejtim të godinës së Bashkisë, ku për pasojë kanë thyer disa xhama si dhe kanë goditur me sende të forta shefin e Rendit, Mariglen Jaçellari.

“Specialistët për Hetimin e Krimeve në Komisariatin e Policisë Korçë, në bashkëpunim me strukturat e DVP Korçë, në përfundim të veprimeve të kryera, në lidhje me protestën e paligjshme të zhvilluar ditën e djeshme, përpara godinës së Drejtorisë Vendore të Policisë Korçë dhe Bashkisë Korçë, kanë filluar procedimin penal në gjendje të lirë ndaj shtetasve:

S. M., 30 vjeçe; E. M., 21 vjeç; H. K., 23 vjeç; E. V., 21 vjeç; K. Dh., 27 vjeç; E. T., 27 vjeç; Gj. L., 22 vjeç; S. D., 41 vjeç; D. H., 38 vjeç, banues në Korçë e Maliq.

Shtetasit e lartpërmendur, kanë protestuar në mënyrë të paligjshme duke hedhur sende të forta në drejtim të godinës së Bashkisë, ku për pasojë kanë thyer disa xhama, kanë shkatërruar dekoret festive, kanë djegur dy bredha dhe kanë goditur me sende të forta në kokë për shkak të detyrës, punonjësin e policisë M. J., i cili mori mjekim në Spitalin e Korçës dhe ndodhet jashtë rrezikut për jetën”, thuhet në njoftimin e policisë.

Lexoni gjithashtu:

Zjarr dhe gurë në Korçë, të rinjtë thyejnë xhamat e bashkisë, shoqërohen disa persona