Rama: Ta harroni dorëheqjen e Ardi Veliut, Policia e Shtetit s’merret dot peng

Kryeministri Edi Rama nëpërmjet një postimi në Twitter është shprehur i prerë se nuk do të japë dorëheqjen Drejtorit i Përgjithshëm i Policisë, Ardi Veliu.

“Kërkojnë dorëheqjen e Drejtorit të Përgjithshëm të Policisë se ndryshe do djegin e shkatërrojnë? Ta harrojnë! Gabon shumë kush kujton se qytetaria e ministrit të brendshëm është dobësi dhe harron se ky shtet është i qytetarëve jo i barbarëve! Pushteti merret me votë jo me djegie!”, shprehet Rama.

Kreu i qeverisë, duke iu kthyer kështu një përgjigje protestuesve, shkruan më tej se policia e shtetit nuk do të merret peng në asnjë mënyrë.

Sipas tij Policia e Shtetit nuk është një polic që vrau e që sot është në duart e drejtësisë.

“Ne nuk do të lejojmë askënd që të rrënojë çka është ndërtuar me mund e me punë të madhe dhe Policia e Shtetit është një nga shembujt e ndryshimit, që vazhdon me mundin e shumë njerëzve çdo ditë! Shantazhet dhe dhuna ndaj policisë nuk kanë lidhje as me lirinë as me demokracinë!

Policia e Shtetit as do merret dot peng, as do lëkundet dot nga politika e vjetër e dhunës e nga dhunuesit e nxitur prej saj! Policia e Shtetit nuk është një polic që vrau e që sot është në duart e drejtësisë dhe kush nuk do të respektojë ligjin do përballet me forcën e ligjit!”, shkruan Rama. 

Kërkojnë dorëheqjen e Drejtorit të Përgjithshëm të Policisë se ndryshe do djegin e shkatërrojnë? Ta harrojnë! Gabon shumë kush kujton se qytetaria e ministrit të brendshëm është dobësi dhe harron se ky shtet është i qytetarëve jo i barbarëve! Pushteti merret me votë jo me djegie!

— Edi Rama (@ediramaal) December 11, 2020

Ky reagim vjen pas ngjarjes së rëndë që ndodhi 4 ditë më parë në kryeqytet, ku efektivi me iniciale N.H vrau me armë zjarri 25-vjeçarin Klodian Rasha.

Për këtë ngjarja deri më tani janë zhvilluar dy protesta, ku nuk kanë munguar tensionet dhe përplasjet, ndërsa sot pritet një e tretë.

Sakaq, një ditë më parë dha edhe dorëheqjen ministri i Brendshëm Sandër Lleshaj.

Lexoni gjithashtu:

https://euronews.al/aktualitet/2020/12/11/qellova-drejt-kembeve-te-rashes-deshmon-efektivi-klodiani-bertiti-e-gjeta-pa-shenja-jete

Gjykata e Tiranës lë në qeli efektivin që vrau Klodian Rashën