Meta kthen për rishqyrtim buxhetin e vitit 2021

Presidenti Ilir Meta ka kthyer për rishqyrtim projektligjin për buxhetin e vitit të ardhshëm. Lajmi u njoftua në një konferencë për shtyp nga drejtori i Kabinetit të Presidentit, Edmond Panariti.

Ai tha për mediat se Presidenti vendosi të kthejë për rishqyrtim projekt-buxhetin pasi:

• S’parashikon fonde të mjaftueshme për të përballuar pandeminë;
• S’parashikon fonde të mjaftueshme për të mbështetur biznesin e vogël nga ndikimi i pandemisë;
• S’ka zbatuar rekomandimet e institucioneve ndërkombëtare për të mos zgjeruar projektet me partneritet publik-privat;
• S’parashikon uljen e varfërisë për grupet më në nevojë;
• S’parashikon uljen e papunësisë dhe rritjen e punësimit;
• S’ka projekt-plan se si do të ulet borxhi i rritur publik;
• S’ka program masash për uljen e detyrimeve të prapambetura;

Panariti e cilësoi buxhetin “jo-realist” teksa theksoi me keqardhje se nuk ka tregues objektiv për sa i përket parashikimeve për ritje ekonomike, për përmirësimin e treguesve fiskal apo dhe treguesve ekonomikë të ndërmarrjeve shtetërore.

Në argumentin e shtjelluar më tej në web-faqen e Presidentit thuhet se në projekt-buxhet “politikat fiskale mbeten të diferencuara” për sa i përket: rritjes së pagave, tatim-fitimit, amnistisëfiskale dhe programit të investimeve publike.

Presidenti shpreh shqetësim pasi gjatë vitit 2020 ekonomia shqiptare hyri në recension, si pasojë direkte e pandemisë, ndërsa borxhi publik ka shkuar në 80.9% e Prodhimit të Brendshëm Bruto (PBP).

Të dhënat e Institutit të Statistikave tregojnë se vetëm gjatë periudhës mars-qershor vendi humbi 50 mijë vende pune si pasojë e pandemisë dhe pasojave që shkaktoi tërmeti i 26 nëntorit 2019.

Institucionet ndërkombëtare të ekonomisë si Banka Botërore, Fondi Monetar Ndërkombëtar apo Banka Evropiane për Rindërtim dhe Zhvillim parashikojnë rënie ekonomike nga -7.5% deri në -9%, ndërkohë që prodhimi i brendshëm të bjerë deri në 35.3%.

Krahas kësaj situate, viti i ardhshëm është edhe vit zgjedhor, çka pritet të kërkojë fonde të tjera, ndërkohë që qeveria nga ana tjetër ka premtuar ulje taksash, rritje pagash dhe vijim të investimeve publike.