Protestat për vrasjen e Klodian Rashës, arrestohen 4 persona, procedohen në gjendje të lirë 46 të tjerë

Përmes një njoftimi Policia e Shtetit bëri me dije se nga protesta e bërë për vrasjen e Klodian Rashë janë arrestuar në flagrancë 4 qytetarë dhe në gjendje të lirë po procedohen 46 qytetarë të tjerë.

Akuzat që rëndojnë lidhen me grumbullime, manifestime të paligjshme, shkatërrim i pronës publike dhe plagosje e një punonjësi policie.

“Ndërkohë, vijon puna për identifikimin dhe kapjen e personave të tjerë të përfshirë në veprime të dhunshme ndaj Policisë, pronës shtetërore dhe asaj private,” – thuhet në njoftimin e Policisë së Shtetit.

Së fundmi Policia e Tiranës apeloi për respektimin e protokollit anti-COVID me qëllim parandalimin e përhapjes së virusit dhe gjithashtu bëri thirrje që qytetarët t’i adresojnë problemet e tyre pranë institucioneve duke shmangur kësisoj protestat.