Veliaj vijon turin falënderues: Fitorja erdhi se punojmë çdo ditë si të jetë fushatë

Kryebashkiaku i Tiranës, Erion Veliaj ka vijuar me turin e tij falënderues duke u ndalur në lagjen 12.

Teksa iu shprehu mirënjohjen banorëve të zonës për kontributin në zgjedhjet e 14 majit, ai vuri në dukje se fitorja erdhi si pasojë e punës së përditshme.

“Fituesi është ajo forcë, ai grupim njerëzish, ajo familje që nuk kujtohet vetëm në ditët e fushatës, por që fushatën e ka të përditshme. Ky është shpjegimi i fitores sonë, fakti që kemi qenë me njerëzit përditë, përnatë, me diell, me shi, me tërmet, pandemi dhe njerëzit nuk e harrojnë këtë. Ndaj, ftesa ime është që të vazhdojmë të njëjtën formulë suksese, që ka funksionuar deri tani, të jemi përditë me njerëzit, të punojmë përditë për njerëzit”, tha kryebashkiaku.

Veliaj nuk la pa komentuar edhe fushatën e opozitës që në gjykimin e tij ishte e shtrenjtë.

“Kur erdhi puna te fushata, krahasuar me 30 ditë luks, me stadiume, me ekrane, foni e koncerte, me autobusë e me kamionë, me taksi, çdo gjë falas, me avionë, njerëzit thanë: “Prit pak, ku ishin këta? 30 ditë paskan pasur shumë pare!”. Fushata jonë modeste bërtiti më shumë, jo se kishte më shumë foni, por veprat tona flisnin më shumë se të gjitha fonitë”, u shpreh Veliaj.

Fushata më e mirë që iu solli dhe fitoren, sipas Veliajt është puna e çdo dite.

LEXONI GJITHASHTU:

• Nga Veliaj te Sako, KQZ i jep mandatin kryetarëve socialist të bashkive më të mëdha
• Fitorja nuk është triumf politik, Veliaj: Mundësi për punë e projekte të reja