“Fitorja nuk është triumf politik”, Veliaj: Mundësi për punë e projekte të reja

Kryetari i Bashkisë Tiranë, Erion Veliaj në një takim me banorët e njësisë numër 1 në kryeqytet deklaroi se fitorja në 14 maj është një mundësi për më shumë punë dhe projekte të reja.

Në vijim të turit të falenderimeve në çdo njësi të Tiranës, kryebashkiaku Erion Veliaj u ndal në një takim me banorët e njësisë numër 1 ku deklaroi se fitorja e 14 majit nuk duhet parë si një triumf politik, por si një mundësi për t’u shërbyer të gjithë qytetarëve njësoj.

“Pavarësisht kë votove, Partia Socialiste, kryetari ynë dhe Këshilli Bashkiak është këtu që të të shërbejë ty, familjes tënde, fëmijëve të tu, sepse në këtë qytet ne njohim vetëm ngjyrat kuqezi të flamurit, të kombit tonë, dhe kulturës sonë, për t’u shërbyer të gjithëve kudo ku janë, pa asnjë dallim”- tha Veliaj.

Veliaj kërkoi bashkëpunimin e të gjithë këshilltarëve bashkiakë, përfshirë edhe atyre të opozitës.

“Ftesa për çdo njeri është: Ne duam t’u shërbejmë të gjithëve, edhe atyre që janë demokratë e që votuan parti të tjera. Në Këshillin Bashkiak kemi 34 mandate, nga 31 që na duhen, nuk kemi nevojë për asnjë forcë tjetër, por ne kemi dëshirë, që edhe ata të tjerët që mendojnë ndryshe, për ta çuar Tiranën përpara”- përfundoi ai.

LEXONI GJITHASHTU: 

• Vuçiç viztion ushtarët e dislokuar serbë pranë kufirit me Kosovën
• Nuk kanë fund telashet për Juventusin, tjetër dënim për ekipin italian