Rally Albania në Voskopojë, 400 pjesëmarrës në garë, të huajt mahniten nga Shqipëria

Mbi 200 mjete sportive Rally dhe afro 400 garues kanë zbarkuar në fshatin turistik të Voskopojës, për ndalesën e tyre të tretë.

Ky është edicioni i 19 i kësaj gare, e cila në itinerarin e saj këtë vit përfshin Velipojën, Voskopojën, Beratin.

Aventurë, baltë, emocione, adrenalinë, mikpritje dhe ushqim të mirë, kështu e përshkruajnë të huajt deri tani Shqipërinë.

“Shqipëria është fantastike. Është hera e dytë që vij, me pëlqen shumë dhe gjithmonë kur te mundem do të rikthehem. Kjo garë është shumë e bukur, emocionuese, me pëlqejnë karakteristikat këtu që nuk i gjen shpesh, rrugët këtu janë të vështira por kjo e bën garën me të bukur”, thotë një pjesëmarës.

“Vij nga Italia, jemi lodhur, është hera e parë që vij këtu dhe zakonisht jam mësuar në AbuDabi, nëpër rrugë me asfalt, por ky terreni është dashuri. Shqipëria dhe njerëzit janë më të mirë në botë”, shprehet një tjetër.

Përpos garës, një nga qëllimet kryesore të këtij evenimenti është promovimi turistik që i bëhet vendit duke ndikuar pozitivisht në rritjen e ekonomisë lokale.

“Siç e shihni këtë vit ka pasur jashtëzakonisht shumë pjesëmarrje, kanë qenë gati 200 mjete dhe 400 garues, bashkë me staf bëhen gati 500 veta. Jemi duke shkuar në qytete të ndryshme dhe patjetër rrisim dhe ekonominë jo vetëm bëjnë garë, kanë pjesën e sfidën e të pasionit por ndihmojnë Shqipërinë në promovim dhe rritjen ekonomike dhe vet shqiptarët gjithashtu”, thotë Julinda Dhame, organizatore.

Rally Albania këtë vit ka nisur në datën 3 dhe përfundon në 10 qershor, me një festë të madhe në sheshin “Skënderbej” në Tiranë.

LEXONI GJITHASHTU:

• Vdes legjenda e Rally-t, u aksidentua me motorin e dëborës
• 250 pilotë të huaj të Rally Albania garojnë në Pogradec