Çuçi në vend të Lleshajt, Basha: Shqipëria në krizë, Rama e ka mendjen si t’i bëjë ministra miqtë e tij

Kryetari i Partisë Demokratike, Lulzim Basha komentoi pasditen e së mërkurës vendimin e kryeministrit Edi Rama për të emëruar ministër të Brendshëm Bledi Çuçin.

Përmes një postimi në Facebook, Basha u shpreh se qeveria e Kryeministrit Edi Rama ka abuzuar vazhdimisht duke nëpërkëmbur nevojat e qytetarëve.

Ai tha se kryeministri “e ka mendjent t’i bëjë ministra miqtë dhe të afërmit e tij” dhe “të bëjë shopping në dyqanet luksoze të New Yorkut” pas udhëtimeve “me Charter”, ndërkohë që “Shqipëria ka nevojë për qeveri që kujdeset për njerëzit dhe jo për veten e saj”.

“Durimit i ka ardhur fundi, është koha për ndryshim!” – theksoi Basha në fund të mesazhit të tij.

Pjesa “Koha për ndryshim!” ishte slogan i Partisë Demokratike në zgjedhjet e vitit 2005 kur demokratët e kryesuar nga Sali Berisha fituan zgjedhjet.

Ditët e fundit Basha e ka përsëritur këtë shprehje disa herë në postimet e tij.

Zgjedhjet parlamentare zhvillohen më 25 prill 2021 dhe aktualisht ende asnjë nga partitë nuk është mobilizuar për të përcjellë platformat e tyre apo dhe sloganet me të cilat do të garojnë në zgjedhje.

Lexoni gjithashtu:

Rama përzgjedh Bledi Çuçin si ministër të Brendshëm