Në gjyq ushtarët ukrainas, Rusia bombardon zonat e banuara

Më shumë se 20 ushtarë ukrainas të kapur rob janë paraqitur të enjten në gjyq në jug të Rusisë.

Ata ishin anëtarë të njësisë elitë të njohur si Batalioni i Azovit, që luftoi kundër trupave ruse në portin e Mariupolit.

Rusia e mori nën kontroll Mariupolin vitin e kaluar, pas një beteje tremujore që e ktheu qytetin në gërmadhë. Moska e konsideron Batalionin e Azovit një grup terrorist.

Ndërkohë, në Ukrainë raketat ruse kanë goditur zona të banuara në jug dhe lindje të vendit.

Në Kramatorsk, një krater i madh u hap pas shembjes së disa shtëpive. Por Rusia deklaron se objektivat e saj janë depo ushtarake.

Nga ana e tij, Kievi ka deklaruar se ka avancuar në kundërofensivën e tij, edhe pse aleatët perëndimorë thonë se Rusia po i shkakton humbje të mëdha.

Vizita e shtyrë në impiantin bërthamor të Zaporizhias nga shefi i agjencisë bërthamore të OKB-së tani pritet të realizohet. Ky do të jetë udhëtimi i parë i Rafael Grossit që nga shembja e digës së Kakhovkës.

Centrali ndodhet pranë vendit të incidentit dhe e merr ujin për t’u ftohur nga rezervuari i formuar nga diga.