Koncesioni i ‘check up-it’, PD akuzon qeverinë se ka hartuar një kontratë korruptive

Sekretari për Çështjet Ligjore në Partinë Demokratike, Çlirim Gjata në një deklaratë për mediat, denoncoi koncesionin e check up-it, teksa akuzoi kryeministrin Edi Rama i ka dhuruar Vilma Nushit  8,5 milionë euro përmes kontratës korruptive.

Gjata shtoi se kryeministri Rama dhe qeveria e tij vjedhin shqiptarët për të pasuruar oligarkët.

“Të dhënat zyrtare tregojnë se Edi Rama i ka dhuruar financueses së e fushatës së tij elektorale, Vilma Nushi, 8,5 milionë euro përmes kontratës korruptive të koncesionit të check up-it.

Një raport i dhjetorit për koncesionet i Ministrisë së Financave, konfirmon se për 3 vitet e para të lidhjes së kontratës së dështuar dhe korruptive të check up-it, mikesha dhe financuesja e Edi Ramës është paguar për 580 mijë kontrolle të pakryera. Fatura që shqiptarët kanë paguar për të pasuruar oligarken dhe kryeministrin është 8.5 milionë euro”, – tha Gjata.