Sulm me dronë në Moskë, devijohen fluturimet në aeroportin ‘Vnukovo’

Një sulm me dronë, të cilin autoritetet ruse ia atribuojnë Ukrainës, është kryer në Moskë duke shkaktuar devijimin e fluturimeve nga aeroporti ndërkombëtar “Vnukovo”.

Raportohet se të paktën 5 dronë u përdorën në sulmin e së martës, i cili vuri gjithashtu në shënjestër lokalitete në rrethinat e kryeqytetit rus.

Megjithatë, Ministria ruse e Mbrojtjes deklaroi se të gjithë dronët ishin qëlluar dhe rrëzuar dhe rrjedhimisht nuk kishin shkaktuar viktima apo dëme materiale.

Nga ana e saj, Ukraina nuk e ka marrë përsipër përgjegjësinë e sulmit.

Kufizimet në “Vnukovo”, një nga tre aeroportet ndërkombëtare të Moskës, u hoqën disa orë më vonë. Fluturimet nga Turqia, Emiratet e Bashkuara Arabe dhe Egjipti ishin mes atyre të prekura.

Qeveria ruse ka saktësuar më tej se 4 nga dronët që po fluturonin mbi rajonin e Moskës u qëlluan nga sistemet mbrojtëse ajrore, ndërsa i pesti u lokalizua elektronikisht përpara se të përplasej.

“Një përpjekje nga regjimi i Kievit për të sulmuar një zonë ku ndodhen infrastruktura civile, përfshirë një aeroport ku qarkullojnë fluturime ndërkombëtare, është një akt i ri terrorist”, ka deklaruar zëdhënësja e Ministrisë së Jashtme ruse, Maria Zakharova.

Ky nuk është sulmi i parë me dronë që vë në shënjestër Moskën. Në muajin maj, Kremlini deklaroi se të paktën 8 dronë kishin sulmuar kryeqytetin, duke shkaktuar dëme të vogla. Ndërsa në shkurt, një dron u përplas me selinë e Kremlinit.

Në të dyja rastet, Kievi mohoi përgjegjësitë.