Muzeu “Gjon Mili”, turistë të huaj dhe vendas përjetojnë emocione të veçanta  

Në dhjetorin e vitit 2018 në Korçë u hap muzeu “Gjon Mili”, kushtuar fotografit korçar, i njohur në mbarë botën për teknikën e tij unike të fotografimit me dritë.

Në këtë muze ekspozohen 240 fotografi të mjeshtrit botëror me origjinë shqiptare Gjon Mili, thënie të tij apo për të nga të tjera ikona botërore.

Sot, pikërisht ky muze shërben si atraksion për shumë turistë të huaj e vendas, të cilët shprehin konsideratat më të larta dhe kënaqësinë e veçantë që ata përjetojnë në këtë muze.

Një punonjëse në Muzeun e Gjon Milit tregon se gjatë fundjavave ka pasur një fluks të lartë vizitorësh të cilët kërkojnë të shohin dhe vlerësojnë punën e fotografit të njohur me origjinë shqiptare.  

Më tej ajo shton se “më se shumti vizitoret janë te huaj por në këto ditë festash ka pasur një fluks turistësh vendas”.

E nëse Korca ka plot pika turistike të cilat ja vlejne të vizitohen, muzeu duhet të shtohet ne listen e vendeve ku nuk duhet lënë pa e vizituar.

Kush ishte Gjon Mili?

Gjon Mili lindi në vitin 1904 në Korçë. Së bashku me familjen e tij ata emigruan në Rumani, aty ku ai përfundoi dhe studimet e mesme. Në vitin 1923, Mili u nis drejt Amerikës, ku përfundoi dhe studimet e tij të larta në universitetin e njohur “Massachusetts Institute of Technology” (MIT) ku u diplomua si inxhinier ndriçimi.

Ai ka punuar për revistën e njohur amerikane “Life” si dhe ka bashkëpunuar me figura të rëndësishme në botën e artit si Picasso, regjizorin Alfred Hitchcock, kompozitorin Igor Stravinski, piktorin Henri Matisse, këngëtarin Frank Sinatra si dhe presidentin e SHBA Harry S. Truman.

Gjon Mili vdiq në Stamford, Konektikat, më 14 shkurt të vitit 1984.