Vrasje e dyfishtë në Tiranë, 59-vjeçari ekzekuton bashkëjetuesen dhe motrën e saj, dorëzohet në polici

Krimi në familje ka tronditur kryeqytetin mëngjesin e kësaj të enjte ku një 59-vjeçar ka ekzekutuar bashkëjetuesen dhe motrën e saj.

Autori i identifikuar si Përparim Ademi ka ndërmarrë aktin e rëndë në prani të fëmijëve të mitur të bashkëjetueses dhe disa orë më pas është vetë-dorëzuar në polici ku ka deklaruar se ekzekutimin e ka kryer nga xhelozia.

Banorët e rrugës Bajram Bushica njoftuan policinë për të shtëna me armë rreth orës 10 e 30 minuta.

Kur mbërritën në zonën e njohur si “Astiri”, oficerët e policisë konstatuan një ngjarje të rëndë. Pesëdhjetenëntëvjeçari i identifikuar si Përparim Ademi kishte ekzekutuar bashkëjetuesen e tij dhe motrën e saj, të dyja rreth 40 vjeçe, pas një konflikti fillimisht verbal e më pas me përdorimin e armës.

Përparim Ademi i cili më herët ka mbajtur edhe mbiemrin Tela, aktin e rëndë e ka kryer në prezencën e dy fëmijëve të mitur të bashkëjetueses së tij Zhaneta Metani. Pas ekzekutimit të dyfisht autori ka zgjedhur të largohet në këmbë nga vendngjarja për tu dorëzuar vetëm 2 orë më vonë në policinë e Tiranës.

Motiv i ngjarjes së rëndë dyshohet se është bërë vendimi i bashkëjetueses së 59-vjeçarit Ademi për të mos vijuar lidhjen e tyre. Këtë dyshim e shprehu edhe Drejtori i Policisë së Tiranës, Reban Jaupi për Euronews Albania.

Uniformat blu kanë bërë të mundur sekuestrimin e armës së zjarrit tip kallashnikov që 59 vjeçari e la në banesën ku u regjistrua ngjarja e rëndë. V

etë autori në deklarimin paraprak para oficerëve është shprehur se vrasjen e kreu për xhelozi ndërsa lidhur me krimin në pyetje në praninë e psikologëve pritet të merren edhe fëmijët e mitur të cilët kanë qenë present në momentin e ekzekutimit të dyfishtë që tronditi Tiranën.

Përditësuar në 16:00