Balla viziton efektiven e aksidentuar: Shoferët të respektojnë rregullat

Ministri i Brendshëm Taulant Balla vizitoi sot në Spitalin e Traumës efektiven e Policisë Rrugore, Arta Shurbi.

Kjo e fundit u plagos paraditen e së mërkurës si pasojë e përplasjes së dy mjeteve në Vorë.

Ndërsa tha se gjendja e Shurbit është e stabilizuar, Balla bëri thirrje që të gjithë shoferët të jenë  të kujdesshëm dhe të respektojnë rregullat e qarkullimit rrugor.

“Dua t’i bëj një apel publikut, kemi nevojë edhe për mbështetjen e mirëkuptimin tuaj! Punonjësit e Policisë janë aty për t’u kujdesur për sigurinë rrugore. E ndaj, apeli ndaj atyre që janë në timon është që ju lutem respektoni rregullat e qarkullimit rrugor, limitet e shpejtësisë e të gjitha parashikimet që ka Kodi Rrugor. Jemi aty jo për të vendosur gjoba, por për të ndërgjegjësuar të gjithë ata që janë në timon që të respektojnë normat dhe kërkesat e Kodit Rrugor,” – u shpreh ai.

Ministri tregoi se Shurbi ka qenë në atë zonë sepse ka ndodhur një aksident, më pas ka ardhur një mjet tjetër që e ka aksidentuar dhe atë vet.

Balla theksoi se fokusi i tyre, ndër të tjera është dhe te kujdesi për çdo punonjës policie.

LEXONI GJITHASHTU:

• Hera e dytë që aksidentohet në detyrë, kush është efektivja që u përplas në Vorë
• Aksident në Vorë/ Përplasen dy makina, lëndohet efektivja e policisë