Junta në Niger kërcënon të vrasë presidentin nëse nis ndërhyrja ushtarake

Anëtarët e juntës ushtarake në Niger i kanë thënë një diplomati të lartë amerikan se do të vrasin presidentin e rrëzuar Mohamed Bazum nëse vendet në rajon tentojnë ndonjë ndërhyrje ushtarake për ta rikthyer atë në pushtet, raportoi Associated Press, duke cituar dy zyrtarë perëndimorë.

Ata i thanë zëvendëssekretares amerikane të shtetit Victoria Nuland gjatë vizitës së saj në Niger në fillim të kësaj jave, tha një zyrtar ushtarak perëndimor për AP, duke folur në kushte anonimiteti për shkak të ndjeshmërisë së situatës.

Një tjetër zyrtar i konfirmoi pretendimet, gjithashtu në kushte anonimiteti sepse nuk është i autorizuar të flasë për mediat.

Bazumi u rrëzua nga krerët e grushtit të shtetit të 26 korrikut dhe po mbahet i burgosur në rezidencën e tij. Krerët e shteteve të Afrikës Perëndimore u takuan të enjten për të diskutuar hapat e ardhshëm pasi junta ushtarake e Nigerit shpërfilli afatin e tyre të 6 gushtit për të rivendosur presidentin e rrëzuar, por analistët thonë se bllokut të njohur si ECOWAS mund t’i mbarojnë opsionet pasi ndërhyrja ushtarake mbështetëse zbehet.

“Është thelbësore që ne t’i japim përparësi negociatave diplomatike dhe dialogut si bazë të qasjes sonë”, tha presidenti nigerian Bola Ahmed Tinubu, i cili aktualisht kryeson bllokun, përpara seancës së mbyllur të takimit.

Ai tha se udhëheqësit duhet të vepronin me një “ndjenjë urgjence”, megjithëse dukej se po tërhiqeshin nga kërcënimi i mëparshëm i bllokut për të përdorur forcën.

LEXONI GJITHASHTU:

• SHBA-ja dhe OKB-ja të shqetësuara për gjendjen e presidentit të rrëzuar të Nigerit
• BE nis sanksionet ndaj juntës ushtarake në Niger