Ortakët sherr për pallatin, plagoset biznesmeni dhe kalimtari

Pasi ishin konfliktuar fizikisht disa ditë më parë, ortakët e këtij pallati në ndërtim e sipër në rrugën “ Ndre Mjeda ”, do ta vijonin konfliktin mëngjesin e kësaj të mërkurë. Por këtë herë përplasja agravoi në përdorimin e armës ku për pasojë mbeti i plagosur biznesmeni 45-vjeçar Sino Llanaj.

Plumbat e pistoletës plagosën edhe një kalimtar të rastit ndërsa gjatë sherrit mes 2 grupeve, dëmtime nga sende të forta mori edhe roja i objektit. Pak orë pas ngjarjes në polici u dorëzua biznesmeni tjetër i përfshirë në sherr, Albert Allmuça i cili ka mohuar autorësinë e plagosjes ndërsa në komisariat janë shoqëruar edhe persona të tjerë.

Polica ka sekuestruar disa kamera sigurie për zbardhjen e ngjarjes ndërsa një prej pronarëve të truallit ku është ndërtuar pallati tregoi problemet që ka sjellë ky ndërtim.

Sipas informacioneve biznesmenët kishin prishur kontratën e bashkëpunimit disa kohë më parë ndërsa kjo gjë ka sjellë probleme për personat që kanë porositur apartamente dhe ato që kanë dhënë tokën ose banesën e tyre për investim.