Nisin premtimet e 14 shkurtit, liderët politikë në Kosovë shpalosin projektet pa filluar fushata 

Dikush miliarda investime në ekonomi, dikush bashkim të Kosovës me Shqipërinë, e të tjerë shprehen për faktorizimin e diasporës. Këto janë disa nga premtimet që kanë nisur të japin politikanët kosovarë në parafushatën elektorale për zgjedhjet e 14 shkurtit.

“Dhe në këto zgjedhje, ka dy alternative. Një alternativë që është e PDK-së që përmes sektorit privat të krijojmë vende të lira të punës, ta rrisim ekonominë, ekonominë dhe mirëqenien e qytetarëve dhe një alternativë tjetër që përkrahet nga Vetëvendosje që është një alternativë e së kaluarës”, është shprehur Enver Hoxhaj, kryetar në detyrë i PDK-së.

Fjala referendum, por në kontekste të ndryshme, ka nisur të përdoret më shpesh në këtë fushatë elektorale.

“Unë s’kam kërkuar referendum deri sot. Hera e parë që po e kërkoj referendumin, zyrtarisht po e kërkoj që në 2025, nëse Kosova nuk i ka arritur rezultatet e drejta që i takojnë t’i mbërrijë drejt BE-së, NATO-s e OKB-së, atëherë unë do të votoj bashkim me Shqipërinë”, ka thënë Ramush Hardinaj, kryetar i AAK-së.

Por, në kontekst të ndryshëm e përdorin politikanët e tjerë, sikurse Vjosa Osmani, gjatë një konference online për diasporën.

“Është një kohë e rëndësishme edhe për pjesëmarrjen tuaj, ndërsa të gjithë e kuptojmë se kjo pjesëmarrje ka qenë thelbësore në zgjedhjet e kaluara, mendoj se është edhe më thelbësore tani. Një proces që janë thjesht zgjedhje, ne e quajtëm atë një referendum, sepse besojmë se është i tillë”, është shprehur Vjosa Osmani.

Kryetari i Vetëvendosjes, Albin Kurti, i cili së fundi ka dalë shumë rrallë në publik, në konferencën e njëjtë tha se pas fazës së çlirimit e pavarësisë, tani radhën ka etapa e tretë.

“Tani ne duhet të kalojmë në dekadën e tretë, e cila duhet të jetë ajo e drejtësisë dhe zhvillimit, që do të thotë luftë kundër korrupsionit dhe punësimi i njerëzve, në veçanti i të rinjve dhe grave, dhe zhvillimi ekonomik i vendit tonë”, ka thënë Kurti.

Sidoqoftë, nga 3 shkurt deri me 12 shkurt, zyrtarisht në Kosovë do të jetë  në fushatë elektorale dhe sipas dinamikës, premtimet do të jenë edhe më të shumta edhe më të ndryshme.