Katër viktimat e 21 janarit shpallen ‘Dëshmorë të Atdheut’, Rama: Të veprojë drejtësia

Kryeministri Edi Rama në ditën përkujtimore të “21 janarit” u shpreh se 4 të vrarët gjatë protestave në Bulevardin “Dëshmorët e Kombit” më 21 janar të vitit 2011 janë shpallur “Dëshmorë të Atdheut”.

Sipas kreut të qeverisë, Aleks Nika, Ziver Veizi, Hekuran Deda dhe Faik Myrtaj janë shpallur dëshmorë.

“Në këtë 10-vjetor qeveria e Republikës së Shqipërisë ka vendosur të japë titullin e lartë të “Dëshmorit të Atdheut”, për të 4 dëshmorët të protestës paqësore të 21 janarit”, u shpreh kreu i qeverisë.

Sipas Ramës vrasjet që ndodhën më 21 janar treguar llumin e politikës dhe drejtësisë.

“21 janari përtej plagëve dhe pangushëllueshme që hapi në shpirtin e familjeve të 4 dëshmorëve dhe përtej plagës së madhe që hapi në shoqërinë tonë, shërbeu për të nxjerrë në pah në sytë e të gjithëve llumin e politikës dhe të drejtësisë”, u shpreh ai.

Kryeministri Rama tha se është i vetëdijshëm që për viktimat e 21 janarit nuk është bërë mjaftueshëm drejtësi, por theksoi se kjo drejtësi nuk mund të vijë as nga qeveria, e as nga parlamenti, por nga pushteti gjyqësor, plotësisht i pavarur nga të gjitha pushtetet e tjera.

Ai vlerësoi angazhimin e qeverisë së tij, që siç tha që ka vendosur në rrugën e zgjidhjes problemin e madh të çlirimit të drejtësisë dhe krijimit të një drejtësie të denjë.

“Qeveria nuk bën rolin e prokurorisë dhe as ministri i drejtësisë, kryeministri s’mund të ngrejë akuza penale për t’ia çuar gjykatës së partisë.

Është drejtësia që duhet ta bëjë këtë, që është e pavarur nga të gjitha pushtetet e tjera. Sistemi i drejtësisë është ende larg së qeni një sistem drejtësi që bën drejtësi.

Jemi ne që vijmë nga rruga e kësaj tragjedie që kemi vendosur në rrugën e zgjidhjes së problemin e madh të çlirimit të drejtësisë dhe krijimit të një drejtësie të denjë”, tha kryeministri.