Fshati pa rrugë në Fier, banorët në Shqop ndihen të izoluar

Rruga e fshatit ku jetojnë qindra banorë është rreth 5 km e gjatë, por prej më shumë se 20 vitesh, në këtë rrugë nuk është kryer asnjë investim. Ata pak banorë që kanë mbetur, kërkojnë ndërtimin e rrugës, pasi në një lloj forme ndihen të izoluar.

Amortizimi i saj bën që edhe drejtuesit e automjeteve të vuajnë pasojat, që për ta përkthehet në kosto. Më e keqe situata paraqitet gjatë stinës së dimrit, ku reshjet e kthejnë në moçal të pakalueshëm.

“Po rruga është shumë e keqe. Po thonë do e rregullojmë sot, do e rregullojmë nesër, po me copa copa,” – tha një grua.

“Te fshati jonë aty ka shumë banorë dhe vijnë në këmbë se me makinë nuk futen aty. Ne me zetor e mezi futemi po cajmë gomat. Shumë e vështirë edhe për zjarrfikëset. Para 20 ditësh digjej mali dhe nuk hynin dot,” – tregoi një burrë.

Banorët tregojnë gjithashtu se rrugët e dëmtuara dhe mungesa e shërbimeve i ka detyruar shpesh që të sëmurët t’i transportojnë në krah drejt spitaleve. Ata apelojnë njëzëri për rikonstruksionin e rrugës kryesore të fshatit, por dhe atyre lidhëse të lagjeve, degradimi ndër vite i të cilave e ka lënë zonën në gjendje të mjerueshme, duke shtyrë edhe ata pak banorë që të largohen përgjithmonë drejt zonave urbane apo në emigrim.

LEXONI GJITHASHTU:

• Fshati pa shkollë në Fier, fëmijët detyrohen të ecin disa km në ditë
• Rama: Ligji për investimet strategjike të ndryshojë, jo fshatra turistik pa hoteleri