Filmi frëngjisht i Woody Allen, 87-vjeçari i pavendosur për mbylljen e karrierës

Si person që e njeh mirë Evropën, Woody Allen zgjodhi Parisin për të ambjentuar filmin e tij të ri “Coup de Chance”, që do të shfaqet në vjeshtë në kinema. Filmi rrëfen historinë e një gruaje që nis të tregojë gënjeshtra e që më pas tradhton partnerin.

Risia kryesore për filmin e tij të 50-të është se ai është xhiruar tërësisht në frëngjisht. Regjisori i njohur ishte në Lion për promovimin e tij. Për të, Parisi dhe Nju Jorku janë dy qytete frymëzuese.

“Nju Jorku dhe Parisi janë shumë të ngjashëm. Janë dy qytete frymëzuese, të mbushura me kulturë, muzikë, teatro dhe kinema. Ndaj, atë që mund të xhirosh në Nju Jork mund ta xhirosh fare lehtë në Paris dhe të gjesh lokalitete shumë më të bukura”, tha Allen.

“Coup de Chance” është një kombinim i dramës dhe komedisë. Edhe pse 87 vjeç, Allen heziton të tërhiqet nga profesioni i tij.

“Tundohem që ky të jetë filmi i fundit. Është i 50-ti që bëj dhe është një numër i rrumbullakosur. Ndaj mund të jetë momenti i duhur për t’u ndalur. Por nga ana tjetër, nëse dikush vjen tek unë dhe më thotë se është gati të financojë filmin tim, atëherë është vështirë të thuash “jo”. Ndaj nuk e di. Gjithashtu nuk më pëlqen as mënyra se si kinemaja ka ecur. Nuk më pëlqen ideja që të punoj për një vit dhe që filmi më pas të shfaqet 2 javë në kinema dhe më pas në televizion ose streaming”, u shpreh regjisori.

Filmi “Coup de Chance” do të shfaqet në ekranin e madh këtë vjeshtë.

LEXONI GJITHASHTU:

• “Fati” i Woody Allen, regjisori 87-vjeçar, në Venecia me filmin “Coup de Chance”
• Dyshime se abuzoi me vajzën e birësuar, pezullohet publikimi i librit të Woody Allen