Meta: Vuçiç në anën e minuesve të dialogut, deklaratat e tij të papranueshme

Kreu i Partisë së Lirisë, Ilir Meta tha në një deklaratë për mediat të martën se veprimtaria kriminale e serbëve në veri të Kosovës ka si qëllim të vetëm destablizimin e situatës dhe krijimin e një tensioni të përhershëm.

Meta u shpreh se deklaratat e presidentit serb Aleksandër Vucic, nuk do ta njohë kurrë, as në mënyrë formale dhe as në mënyrë informale Kosovën, si shtet sovran dhe i pavarur janë të papranueshme.

“Njëkohësisht dua të vlerësoj si të papranueshme deklaratat e presidentit Vuçiç, i cili publikisht deklaroi edhe pas këtij sulmi se nuk do ta njohë kurrë, as në mënyrë formale dhe as në mënyrë informale Kosovën, si shtet sovran dhe i pavarur. Kjo deklaratë e tij e bërë menjëherë pas këtij sulmi kriminal, është një provë e qartë e mungesës së plotë të vullnetit për një dialog të sinqertë mes Kosovës dhe Serbisë, dialog i cili do t’i jepte zgjidhje shumë problemeve të mbetura pezull. Presidenti i Serbisë për fat të keq është vendosur në anën e minuesve të këtij dialogu në funksion të qëllimeve tij politiko-nacionaliste, që nuk i shërbejnë aspak paqes dhe stabilitetit në rajonin tonë si dhe normalizimit të marrëdhënieve midis Kosovës dhe Serbisë. Ngjarjet e dhunshme të ditëve të fundit, janë dëshmi e hidhur e qëndrimeve të vjetra të Beogradit, të cilat pengojnë të ardhmen Europiane të rajonit tonë, ndërkohë që firmosja e marrëveshjes së Brukselit dhe Aneksit të Ohrit si dhe zbatimi i tyre me rigorozitet në terren, do të ishin përgjigja më e mirë për të ardhmen europiane të Serbisë të Kosovës dhe të gjithë rajonit”, tha Meta.

LEXONI GJITHASHTU:

• “Vuçiç të dorëhiqet”- Deputeti serb: Gjenerator i konfliktit, po sakrifikon rininë
• Xhelal Sveçla: Nëse Vuçiç futet në Kosovë pa lejen e qeverisë, do arrestohet