Paratë në fushatën zgjedhore, Celibashi: Financimet e huaja mund të kërcënojnë sigurinë kombëtare

Kontrolli i financimit të partive politike duhet të ketë një vëmendje të jetë në qendër të vëmendjes në zgjedhjet e 25 prillit.

Gjatë një konference ku morën pjesë ambasadorët e huaj në vend dhe përfaqësuesit e partive politike, komisioneri shtetëror i zgjedhjeve, Ilirjan Celibashi deklaroi se financimi i partive gjatë fushatës nga bota e krimit ose bizneset e paligjshme mund të kthehet edhe një rrezik kombëtar.

Sekretari i përgjithshëm i PS, Taulant Balla në fjalën e tij tha se duhen shtuar garancitë për kontrollin e financimit të partive para dhe gjatë fushatës.

“E theksova këtë, sepse vë re një prirje jo të të gjithë aktorëve për të qenë kontribuues në një situatë të tillë. PS e rishpreh vullnetin e qartë për të kontribuar për zgjedhje me standarde. Ajo që është shumë e rëndësishme është transparenca e plotë e financimeve”, u shpreh Taulant Balla, sekretar i përgjithshëm i Partisë Socialiste.

Sakaq, sekretari për çështjet zgjedhore në PD, Ivi Kaso hodhi idenë e ngritjes së një komisioni parlamentar që do të merret enkas me hetimin e financimit të partive.

 “Është koha të vlerësohet krijimi i një komisioni të përhershëm parlamentar për financimin e partive, duhet të drejtohet nga opozita, duhet të ketë kapacitete të plota për të thirrur çdo institucion apo individ për të raportuar për të”, tha z. Kaso.