Shtyhet gjyqi ndaj Mediut, avokatët e viktimave kërkojnë të njohin dëshmitarët

Është shtyrë për në 3 tetor gjyqi ndaj ish ministrit të mbrojtjes Fatmir Mediu. Shkak u bë kërkesa e avokatit të viktimave, Dorjan Matlia për t’u njohur me materialet dhe listën e dëshmitarëve të dorëzuar nga mbrojtja.

Avokatët mbrojtës iu përmbajtën listës me 90 dëshmitarë, mes tyre edhe personalitete te huaja ushtarake dhe politike.

Prokurori Arben Kraja u shpreh kundër këtyre emrave pasi sipas tij Mediu akuzohet për një fakt penal konkret dhe jo nëse demontimi duhej se Shqipëria duhet të ishte pjesë e NATO-s. Avokati i viktimave kërkoi të paraqitet si dëshmitar edhe ish kreu i bashkisë së Vorës Fiqiri Ismaili.

Dhe avokati ishte në të njëjtën linjë me SPAK për personalitetet e huaja të cilët sipas tij do zvarrisnin procesin. Gjykata pritet të shprehet në seancën e radhës për listën e dëshmitarëve.

Çështja ndaj ish-ministrit Mediu është rihapur pasi Zamira Durdaj, e cila humbi të birin në ngjarjen e Gërdecit, e kallëzoi atë në SPAK.

Fillimisht Shkalla e Parë e Gjykatës së Posaçme e rrëzoi kërkesën e SPAK-ut për ta rigjykuar Mediun, me argumentin se kanë kaluar të gjitha afatet ligjore për rishqyrtimin e çështjes dhe se nuk ka prova të reja.

Gjykata pati arsyetuar se mungesa e imunitetit të Mediut, sidomos pas vitit 2019, nuk e ka penguar prokurorinë të nisë procedurat.

Mediu ishte një nga të akuzuarit për shpërdorim detyre për ngjarjen e vitit 2008 ku Shqipëria u trondit nga shpërthimi i një depoje të armëve ushtarake në Gërdec, në afërsi të Tiranës.

LEXONI GJITHASHTU:

• Pranohet gjykimi i zakonshëm për Mediun, avokati i familjarëve: Jemi dakord
• Nga Majko e Kodheli te zyrtarët e Pentagonit, ja dëshmitarët e thirrur nga Mediu