Basha me biznesin fason, premton taksë të sheshtë 9 për qind, ulje të çmimit të naftës dhe rimbursim të TVSH

Kryetari i Partisë Demokratike, Lulzim Basha ka zhvilluar ditën e sotëm një takim me përfaqësues të biznesit fason për të shpalosur programin ekonomik të Partisë Demokratike.

Basha tha se programi i propozuar nuk është një paketë premtimesh, por angazhime që merr qeveria e dalë nga zgjedhjet e 25 prillit.

Teksa e cilësoi biznesin fason si një nga më të prekurit nga pandemia, kryedemokrati premtoi taksë të sheshtë 9 për qind nga 15 që është aktualisht, ulje të çmimit të naftës dhe rimbursim të menjëhershëm të TVSH.

“Taksa e sheshtë 9% është një ulje jashtëzakonisht e madhe krahasuar me taksën 15% që ju paguani. Çmimi i naftës 240 lekë të vjetra për litër karburant i shtuar në këto 8 vite. Çdo litër naftë prej ditës së parë të qeverisë të dalë nga vota e 25 Prillit do të jetë 240 lekë më i lirë.

Dhe kjo pa diskutim do të reflektohet edhe në vlerën e koston e prodhimit tuaj dhe në aftësinë tuaj për të konkurruar me ofertën tuaj ne tregun Europian dhe më gjerë. Për biznesin prodhues e njëjta masë do të merret me energjinë elektrike.

Dhe një pikë tjetër që dua  të përmend para se të vazhdojmë diskutimit është rimbursimi i TVSH-së. Rimbursimi i TVSH-së me të gjithë sektorët e ekonomisë është kthyer në një ankth të paparë dhe padiskutim në një kohë krize detyra e qeverisë, detyra e parë e qeverisë është të mos ta vonojë rimbursimin e TVSH-së”, – u shpreh Basha.