Ekzekutohet me armë zjarri një person në Fier, dyshohet për hakmarrje

Rreth orës 10:30 të mëngjesit të sotëm në vendin e quajtur “Ura e Sheqit”, në Fier shtetasi Shkëlzen Kastrati ka mbetur i vrarë nga persona të paidentifikuar.

Burime për Euronews Albania bëjnë me dije se 42-vjeçari është goditur gjatë lëvizjes me mjetin tip ‘Benz, ML’ dhe ka humbur kontrollin duke u përplasur.

Policia raportoi se autori i dyshuar i vrasjes është larguar nga vendngjarja me një automjet tip ‘Range Rover’, i cili u gjet nga shërbimet i djegur te vendi i quajtur “Mbikalimi i Baltzës”. Në automjet është gjetur edhe një armë zjarri që dyshohet se është përdorur nga autorët për ekzekutimin e Kastratit.

Fillimisht është menduar se ngjarja ishte aksident por sipas burimeve të Euronews Albania dyshohet se vrasja ka ndodhur për motive hakmarrje.

“Në vitin 2016 vëllai i shtetasit Shkëlzen Kastrati ka qenë shënjestër e një atentati ndërkohë automjeti me të cilin udhëtonte viktima nuk ishte në emrin e tij,” raporton gazetari Maçi.

Nga ana e Policisë janë ngritur pika kontrolli dhe vijon krehja e zonës për të bërë të mundur kapjen e autorit.

Sipas burimeve viktima është emër i njohur për Policinë pasi rezulton të ketë qenë me precedent të mëparshëm penal.

Gazetari Merin Maçi sqaroi gjithashtu se janë hedhur dyshime të forta se arma me silenciator e gjetur brenda automjetit ‘Range Rover’ është përdorur për vrasjen.