Shtatë hotele dhe resorte në bregdet, KKT firmos 24 leje të reja

Dhënia e dritës jeshile për ndërtimin e nënkalimit në rreth rrotullimin e TEG dhe 3 karburante të reja në Unazën e madhe të Tiranës janë disa prej vendimeve që ka miratuar Këshilli Kombëtar i Territorit në mbledhjen e fundit.

Spitali Rajonal i Fierit, për të cilin tashmë ka nisur zbatimi, mori po ashtu aprovimin, pasi ky projekt kaloi të gjitha hallkat me procedurë të përshpejtuar me palën turke. Në listën e gjatë të vendimeve bien në sy edhe disa leje për projekte në infrastrukturë, si ndërtimi i rrugës Palasë-Dhërmi në bashkinë e Himarës, apo rruga Shëngjin-Velipojë në Lezhë.

Fokusi i mbledhjes së KKT-së ka qenë edhe bregdeti, kryesisht ai në jug, ku janë miratuar 6 struktura të reja akomodimi, hotele dhe resorte, ku bie në sy edhe ndryshimi i projektit të ndërtimit për kompleksin “Ionian Olea” në Dhërmi.

KKT e ka parë të arsyeshme gjithashtu që të japë leje për zgjerimin e kapacitetit të Landfillit Rajonal të Vlorës, si dhe të shtyjë afatin për ndërtimin e depozitave të karburantit në Porto Romano. Ndërkohë, anëtarët e bordit në KKT kanë aprovuar edhe ndërtimin një objekti të ri pranë Parlamentit, i cili do të jetë në funksion dhe në shërbim të vizitorëve.