“Duhet të respektohen ligjet e luftës”, Erdogan: S’ka justifikim për sulmet në Gaza

Presidenti turk Rexhep Tajip Erdogan ka tërhequr vëmendjen për situatën humanitare në Gaza të Palestinës, duke theksuar se në Gaza nuk ka ujë, bukë dhe ushqim për momentin, gjë që është kundër Deklaratës Universale të të Drejtave të Njeriut.

Duke folur në një mbledhje të Fondacionit Rinor Türkiye në kryeqytetin Ankara të enjten, Erdogan theksoi se ndryshe nga organizatat, shtetet janë të detyruara të respektojnë ligjet e luftës dhe të drejtat e njeriut.

“Ne shohim që kjo linjë po zhduket gradualisht”, tha ai.

Udhëheqësi turk tha se ndërprerja e energjisë elektrike, ujit, karburantit dhe ushqimit të 2 milionë njerëzve në Gaza nuk është as “humane” dhe as nuk ka vend në “ligjet e luftës”.

“Ku është Perëndimi? A kanë ata ndonjë masë në këtë pikë? Ata nuk kanë,” tha ai. “Nuk mund të ketë asnjë justifikim për sulmet ndaj vëllezërve të mi në Gaza, të cilat kanë arritur në nivelin e një masakre”.

Presidenti gjithashtu u bëri thirrje aktorëve me ndikim në rajon që të ulin tensionet, duke thënë: “Ne nuk duam që konfliktet të përhapen në rajonin tonë, në vend që të mbështesim verbërisht dikë, ne u bëjmë thirrje aktorëve me ndikim të ulin tensionin”.

Në lidhje me politikën e Shteteve të Bashkuara ndaj konfliktit Izrael-Palestinë, Erdogan pyeti: A i ka hije një vendi si SHBA-ja të rivendosë paqen, apo të hedh benzinë në zjarr?

Forcat izraelite kanë nisur një fushatë të qëndrueshme dhe të fuqishme ushtarake kundër Gazës së bllokuar, një përgjigje ndaj një ofensive ushtarake të grupit palestinez Hamas kundër Izraelit.

Konflikti filloi kur Hamasi nisi Operacionin Al Aqsa Flood kundër Izraelit, një sulm i befasishëm i shumëfishtë duke përfshirë një breshëri lëshimesh raketash dhe infiltrimesh në Izrael nëpërmjet tokës, detit dhe ajrit.

Më shumë se 2,700 njerëz janë vrarë që nga shpërthimi i konfliktit të shtunën, duke përfshirë mbi 1,400 palestinezë dhe 1,300 izraelitë.

Ministri izraelit i Energjisë, Israel Katz të enjten tha se energjia elektrike, uji dhe karburanti nuk do t’i sigurohet Gazës derisa të gjithë pengjet e saj të lirohen.