Protesta në Evropë, manifestime pro-izraelite dhe pro-palestineze në disa vende

Autoritetet në Paris ndaluan të enjten mbajtjen e dy protestave të planifikuara pro-palestineze dhe ata që u mblodhën u shpërndanë me gaz lotsjellës dhe topa uji.

Ndërsa në Gjenevë, pranë zyrave të OKB-së, protestuesit kërkuan zbatimin e rezolutave të shumta të Këshillit të Sigurimit, duke bërë thirrje për një zgjidhje paqësore të konfliktit.

Adel Mejri, organizator i protestave deklaroi: “OKB duhet të reagojë, organizatat ndërkombëtare duhet të reagojnë jo për të mbrojtur Izraelin, por për të zbatuar rezolutat. Ajo që kërkojmë ne është e thjeshtë: ka rezoluta, ligje dhe konventa të Gjenevës”.

Në qytete të tjera pati edhe manifestime pro-Izraelit, por pjesëmarrësit ishin më të paktë në numër. Në Amsterdam, protestuesit thanë se Izraeli ka humbur luftën në rrjetet sociale dhe po lufton për opinionin e njerëzve.

“Mendoj se Izraeli ka humbur një luftë, atë të rrjeteve sociale, e cila është fituar nga palestinezët. Ndaj, thuajse të gjithë tani janë kundër Izraelit. Për këtë arsye jam e kënaqur që janë mbledhur shumë njerëz për të mbështetur Izraelin”, u shpreh Sabine Sterk, protestuese.

Ndërkohë, në Moskë njerëzit kanë vendosur lule pranë ambasadës së Izraelit, por edhe pranë asaj palestineze. Lidhur me këtë konflikt, Kremlini është përpjekur të qëndrojë asnjëanës.

LEXONI GJITHASHTU:

• Euronews raporton afër Gazas, tanket nisin lëvizjen. Ndodh live sulmi me raketa
• Euronews raporton nga lufta, qytetarët boshatisin rrugët në Tel Aviv
• Ministri i Jashtëm italian shpërthen ndaj Hamasit: Nazistë! U heqin kokën foshnjave