“Rritja e pensionit sa gjysmë kg djathë”, pensionistët në Durrës: E pamjaftueshme

Me çmimet e rritura dhe shpenzimet e larta, për pensionistët e Durrësit rritja e pensioneve me 8.6% është e pamjaftueshme për të përballuar jetesën.

“Ça mi goce 150 mijë lekë, ça blen me 150 mijë lekë? Të jetë të paktën 10 mijë lekë në ditë, 300 mijë në muaj, që të jetoj. Me çfarë do jetoj, po drita, ujë, ilaç rrobash, për të ngrënë, për të pirë, me ça do merren ato?” thotë një pensionist.

“Ilaçet janë të gjitha pa rimbursim, ujë, drita, interneti, iku gjysma e pensionit”, shprehet një pensioniste.

Në ditët e pazarit, qeset e tyre mbushen vetëm me produktet bazike.

Mishi, djathi e peshku janë tashmë “luks”.

“Mish e peshk harroje. Marrim makarona, mbushim tasin e kaq”, thotë një i moshuar.

Ata kërkojnë një rritje reale dhe duket se e kanë të qartë sa duan.

“Sa e ka ai zyrtari që punon, se ne kemi punuar. Kam punuar 47 vjet e marr 200 mijë lekë, ai akoma s’ka filluar punën e merr 1 milion”, shprehet një tjetër

Ndërsa inflacioni për ushqimet vijon të mbetet në nivele të larta me rritje deri në 10% në muaj, qeveria ka vendosur të ndërhyjë dy herë gjatë këtij viti.

Fillimisht duke i dhënë atyre një bonus në muajin prill nga taksa e jashtëzakonshme mbi energjinë dhe tanimë rritjen në masën 8.6%, sipas normës së paraqitur nga INSTAT.

Kjo do të thotë një rritje nga 800 deri në 3000 lekë për afro 50 mijë pensionistët që jetojnë në Durrës nga 1 tetori.

LEXONI GJITHASHTU:

• Rama nga Roma: Tajani dha premtimin se marrëveshja për pensionet do finalizohet
• Bonus dhe rritje për pensionet në shtator, do indeksohen ndryshimet e çmimeve