Sekuestrohet drogë, 1 kallashnikov dhe municione në Kamëz, në pranga tre persona

Policia e Kamzës ka goditur një rast të shitjes së lëndëve narkotike dhe armëmbajtjes pa leje.

Nga shërbimet e Komisariatit të Policisë Nr. 5 bëhet me dije se janë arrestuar 3 shtetas të cilët vepronin në grup për shitjen e drogës.

Policia ka sekuestruar rreth 3 kg e 200 gramë kanabis, një pjesë e ndarë në doza, gati për shitje, 1 armë zjarri automatik dhe municion luftarak.

Lënda narkotike, arma e zjarrit dhe municioni luftarak u sekuestruan në cilësinë e provës materiale.

Ndërkohë që materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.

“Në këtë kuadër është finalizuar operacioni policor i koduar “Combination”, si rezultat i të cilit u arrestuan shtetasit:

1. A., 23 vjeç dhe L. Ç., 59 vjeç, të dy banues në Kamëz;
2. N., 48 vjeç, banues në Valias.

Shërbimet e Policisë kanë lokalizuar në Kamëz, shtetasit K. A. dhe L. Ç., të cilëve, gjatë kontrollit fizik, iu kanë gjetur sasi lënde të dyshuara narkotike kanabis.

Nga verifikimet e kryera ka rezultuar se këta shtetas e siguronin lëndën narkotike nga shtetasi M. N. dhe pasi e ndanin në doza, i shitnin ato në zona të ndryshme të Kamzës.

Gjatë kontrollit në banesën e shtetasit M. N., shërbimet e Policisë gjetën 3 kg e 100 gramë lëndë të dyshuar narkotike kanabis, 1 armë zjarri automatik dhe municion luftarak”, thuhet në njoftimin e policisë.

LEXONI GJITHASHTU:

• Kishin mbjellur 240 rrënjë kanabisi në oborrin e banesës, e “pësojnë” dy vëllezërit
• Bogdanoviç: Kam informacione se Serbia po përgatit një sulm të përgjakshëm në Veri