Ambasadorja Kim sqaron se Rama e ka siguruar rreth çështjes së kandidimit të Doshit

Ambasadorja e SHBA-së në Tiranë, Yuri Kim, i ka dhënë fund spekulimeve duke komentuar hapur sot në Twitter se me kryeministrin Edi Rama ka “mirëkuptim të qartë” për sa i përket vlerësimit nga departamenti amerikan rreth figurës së Tom Doshit si i papërshtatshëm për të përfaqësuar qytetarët.

Në postimin në Twitter ambasadorja thotë se në fakt Kryeministri i ka kujtuar asaj se “ai personalisht e ka përjashtuar Tom Doshin nga Partia Socialiste”.

“Ai [Edi Rama] theksoi se ky person [Tom Doshi] nuk do të ketë asnjë rol në asnjë qeveri që ai do të formojë” – shkroi ambasadorja Kim në Twitter.

Në vitin 2018 departamenti amerikan i shtetit e shpalli Doshin të padëshiruar në SHBA me arsyetimin se ai dyshohet të jetë i përfshirë në korrupsion. Të hënën, teksa rikujtoi rastin e tij, ambasadorja Kim apeloi që partitë politike në Shqipëri të kandidojnë figura sa më të pastra.

Doshi, ish-deputet i Partisë Socialiste në tre legjislatura, pas vitit 2017 ka përfaqësuar Partinë Socialdemokrate, të cilën e drejton prej rreth një viti pas largimit të udhëheqësit të saj Skënder Gjinushi – ky i votuar si kryetar i Akademisë së Shkencave.

Kryeministri Edi Rama iu shmang pyetjes së Euronews Albania nëse do të kishte marrëveshje për koalicion me partinë e Doshit gjatë zgjedhjeve të 25 prillit. Ai tha se do të refuzonte çdo lloj komenti apo përgjigjeje që do të vijnë nga deklarata të ambasadores Kim.

Lexoni gjithashtu:

Tom Doshi kërkon regjistrimin e PSD-së në zgjedhje

Kush po bën fushatë me banditë? Andi Bushati dhe Baton Haxhiu “rrëzojnë” akuzën e Ramës

‘Mesazhi amerikan’ për kandidimin e Doshit, kryeministri Rama shmang pyetjen e gazetares së Euronews Albania

Pastërtia e kandidatëve, ambasadorja Kim rikujton vendimin e DASH për Tom Doshin