Itali, Draghi formon qeverinë, publikohen emrat e kabinetit, nesër betimi

Mario Draghi, ish-kreu i Bankës Qendrore Evropiane, konfirmoi mbrëmjen e së premtes se ishte gati të formonte qeverinë e ardhshme të Italisë dhe publikoi emrat e një kabineti, të përbërë nga teknokratë dhe politikanë nga koalicioni i tij i gjerë.

Presidenti Sergio Mattarella i kërkoi Draghit që të bëhet kryeministër, pasi përplasjet mes partive çuan në rrëzimin e administratës së mëparshme.

Gjithashtu, kreu i shtetit e ngarkoi atë me detyrën për t’u përballur me pandeminë e COVID-19 dhe krizën ekonomike të lidhur me të.

Pas një jave konsultimesh, thuajse të gjitha partitë kryesore të spektrit politik italian shprehën mbështetjen e tyre për Draghin dhe figura të tjera të grupit të tij, që u emëruan ministra.

Kabineti i ri përbëhet nga 15 burra dhe 8 gra dhe pritet të bëjë betimin paraditen e së shtunës.

Pjesë e këtij kabineti është dhe Vittorio Colao, ish-CEO i grupit Vodafone, që është emëruar Ministri i ri Italian për Teknologjinë dhe Inovacionin.