Biden dhe Netanjahu nuk e arrijnë marrëveshjen për armëpushimin në Gaza

Presidenti amerikan, Joe Biden, nuk ka arritur një marrëveshje gjatë bisedës telefonike që zhvilloi më 6 nëntor me kryeministrin izraelit, Benjamin Netanyahu, lidhur me nevojën për një pauzë humanitare në luftën Izrael-Hamas.

Zëdhënës i Këshillit për Siguri Kombëtare i SHBA-së, John Kirby, tha se SHBA-ja “do të vazhdojë të bisedojë për pauzë të përkohshme dhe të lokalizuar të luftimeve”.

Numri i palestinezëve të vrarë në luftën mes Izraelit dhe grupit militant palestinez, Hamas, ka tejkaluar shifrën prej 10.000 personash, ka raportuar Ministria e Shëndetësisë në Gazën e udhëhequr nga Hamasi. Sipas kësaj ministrie, mbi 4.100 viktima ishin fëmijë dhe 2.640 gra.

I pyetur nëse kjo shifër e viktimave do të bëjë që SHBA-ja të mendojë që të ndërpresë mbështetjen për Izraelin, Kirby tha, “mendoj se të gjithë ne duhet ta kujtojmë pse ata po luftojnë” duke iu referuar sulmit të Hamasit ndaj Izraelit më 7 tetor.

Izraeli është zotuar se do të shkatërrojë aftësitë e Hamasit për të qeverisur në Gaza dhe për të sulmuar Izraelin. Që nga 7 tetori, Rripi i Gazës shtëpi e 2.3 milionë palestinezëve ka qenë cak i sulmeve të vazhdueshme ajrore. Ky territor është rrethuar nga Izraeli dhe trupat tokësore po vazhdojnë operacionet e tyre brenda pjesës veriore të qytetit të Gazës, që sipas autoriteteve izraelite, është ndarë nga pjesa tjetër e Rripit të Gazës.

LEXONI GJITHASHTU:

• Qeset plastike me para, Kurti del në terren për të promovuar mospërdorimin e tyre
• Fizioterapistja i shpëton jetën futbollistit gjatë ndeshjes Pogradeci-Butrinti