Votime në pandemi dhe në –0 gradë, përgëzojnë ndërkombëtarët, Mitrovica voton në qetësi

Pas 10 ditësh fushatë zgjedhore, kosovarët janë gjendur para kutive të votimit, për të zgjedhur qeverinë që do t’i qeverisë.

Për të bërë diferencën mes Kurtit, Hotit, Hoxhajt e liderëve të tjerë politikë, ata kanë votuar në zgjedhje të pazakonta, të shënuara nga temperaturat nën zero dhe sfidat e pandemisë.

Edhe pse KQZ-ja dhe Ministria e Shëndetësisë ishin përkujdesur që të respektoheshin masat anti-COVID, pati mjaft qytetarë që qëndruan për kohë të gjatë në radhë, ngjitur pranë njëri-tjetrit.

Megjithatë, siç bën të ditur edhe Komisioni Qendror Zgjedhor në Kosovë, probleme madhore nuk ka pasur, duke i cilësuar zgjedhjet shembullore dhe të organizuara në një kohë shumë të shkurtër.

Ndër të parët votues që u paraqitën pranë qendrave të votimit ishin vetë liderët politikë, të cilët që në fillim u bënë thirrje qytetarëve për qetësi dhe maturi.

Vëzhgimi i zgjedhjeve nga ndërkombëtarët, është përgëzuar menjëherë pas përfundimit të procesit.

Votimet kanë shkuar qetë edhe në Mitrovicën e Veriut, ku për herë të parë, KQZ-ja nuk ka ftuar organizatën e OSBE-ODHIR për të asistuar zgjedhjet, duke e marrë përsipër vetë organizimin dhe menaxhimin.

Ekipi i Euronews Albania ka konstatuar se qytetarët serbë, nuk janë lejuar që të votojnë me dokumente identifikimi serbe, pasi sipas ligjit duhet të votohet vetëm me dokumente identifikimi të Kosovës.

Në lidhje me dokumentet identifikuese, në Kosovë, janë lejuar të votojnë edhe qytetarë të cilëve u kishin skaduar këto dokumente, nismë kjo e dakordësuar më parë nga anëtarët e Komisionit Qendror të Zgjedhjeve.

Një angazhim ndryshe nga herët e tjera, është parë edhe në drejtim të votës së diasporës, e cila pritet të ketë ndikimi në vendimin final, se kush do të drejtojë qeverinë e ardhshme. Vetëm gjatë së premtes në Kosovë mbërritën 16 mijë kuti me vota postare, ndërkohë që në tërësi KQZ-ja ka regjistruar 102 mijë e 100 votues.