Cili do të jetë filmi më i mirë Europian? Pretendentë të fortë në garë

Kush do të jetë pasuesi i filmit “Trekëndëshi i Dëshpërimit”, i Ruben Ostlund, i cili i la pas gjithë të tjerët vitin e kaluar? Këtë vit konkurrenca është shumë e fortë, me pak favoritë dhe me shumë fitues të mundshëm.

Një nga kandidatët më të fortë është filmi “Anatomia e një rënieje” i regjisores franceze Justine Triet, fituese e Palmës së Artë në Kanë.

Është një film magjepsës që analizon jetën e një çifti pas një tronditjeje fatale. Një film shumë evropian, ku fliten anglishtja dhe frëngjishtja e ku interpreton aktorja gjermane Sandra Huller, e emëruar për kategorinë “Aktorja më e mirë”.

“Zona e Interesit” është gjithashtu një nga filmat më goditës të 2023-shit. Drithërues, filmi analizon jetën familjare të kreut të kampit të Aushvicit. Një jetë normale, teksa është në portat e ferrit.

Filmi tregon një normalitet të neveritshëm dhe banalitetin e së keqes.

Një tjetër kandidat është filmi “Kufiri i Gjelbër”, i cili la mjaft përshtypje pozitive në Festivalin e Filmit në Venecia. Ai denoncon trafikun e emigrantëve mes Polonisë dhe Bjellorusisë. Prodhimi i regjisores Anjezka Holland u sulmua ashpër nga konservatorët polakë.

Në garë është edhe “Gjethet e Vjeshtës”, nga regjisori finlandez Aki Kaurismaki; një komedi sa dramatike, aq edhe poetike dhe argëtuese mbi një çift në kërkim të dashurisë.

Në fund, filmi i Matteo Garrone, “Unë, kapiteni” do të garojë për kategoritë “Filmi më i mirë” dhe “Regjisori më i mirë”. Është historia frymëzuese e dy djemve senegalezë, që kalojnë shkretëtirën dhe detin për të ndjekur ëndrrat, pavarësisht rrezikut dhe vdekjes që i ndjekin hap pas hapi.

LEXONI GJITHASHTU:

• “Faksimilet” e Helidon Halitit, çelet ekspozita e kuruar me lirikat e Faslli Halitit
• Charles III flet në parlament/ Objektivat e Qeverisë për vitin e ri legjislativ