‘LDK u kthye në një kopje të zbehtë të LVV’, analisti Pacarrizi tregon arsyet e dështimit të partive të vjetra

Analisti Rrahman Pacarrizi komentoi për Euronews Albania arsyet që sollën dështimin e partive të vjetra në zgjedhjet e 14 shkurtit në Kosovë.

Sipas tij, LDK e Isa Mustafës u ndëshkua edhe më shumë nga elektorati tradicional për faktin se në zgjedhjet e shkuara ndoqën të njëjtën kauzë me LVV, që kishte të bënte me përjashtimin e PDK dhe kur ajo kauzë mbeti e paqenë, LDK sipas tij u shndërruar në një kopje të zbehtë të VV.

“Tani LDK ka kohën e nevojshme të ndërmarrë reforma, janë disa rryma brenda LDK, disa më konservatore, një pjesë që përfaqëson frymën rugoviane dhe më tej një tjetër më frymë  reformatore që nisi nga vijosa osmani”, tha z. Pacarrizi.

Humbja  e PDK sipas tij mund të lidhet me një arsye më të madhe, fakti që kryetari Kadri Veseli dhe lideri historik i saj, Hashim Thaci ndodhen të arrestuar në Hagë.

Sipas z. Pacarrizi Vetëvendosja është ndër partitë më fatkeqe, nisur nga rrethanat ku e gjen vendin në mes të një krize shëndetësore dhe presionit ndërkombëtar lidhur me dialogun me Serbinë.

Kjo, tha analisti, do ta penalizojë Albin Kurtin i cili që në vjeshtë do të përballet me pakënaqësi dhe do të penalizohet në zgjedhjet lokale.