Probleme me shëndetin, Klemend Balili kërkon t’i ndërrohet institucioni i vuajtjes së dënimit

I konsideruar si “Eskobari i Ballkanit”, Klemend Balili i dënuar me 10 vite burg me vendim të formës së prerë kërkon transferimin nga burgu i sigurisë së lartë në Peqin në një burg të zakonshëm.

Gazetari i Euronews Albania, Eni Ferhati, thotë se Balili këtë kërkesë e ka bërë për shkak të problemeve shëndetësore, që sipas tij kërkojnë vizita të vazhdueshme mjekësore.

Për këtë, Gjykata e Elbasanit ka kërkuar të bëhet një ekspertizë mjeko-ligjore, permës së cilës të vërtetohet nëse qëndrojnë apo jo pretendimet e Balilit.

Ai u dënua me burg tetorin e vitit të kaluar si pjesë e një grupi kriminal, i cili trafikonte lëndë narkotike mes Shqipërisë e Greqisë. Por, ky vendim u apelua nga Balili dhe çështja po shqyrtohet në apelin e Gjykatës së Posaçme.