INSTAT: 5600 vdekje më shumë se mesatarja vjetore në 2020

Gjatë vitit të kaluar në Shqipëri u regjistruan 27 605 vdekje, me një rritje të ndjeshme krahasuar me numrin mesatar të vdekjeve që regjistron vendi ynë çdo vit. Të dhënat e INSTAT tregojnë se vetëm gjatë 3-mujorit të fundit humbën jetën 9397 persona, ose 73% më shumë periudha tetor-dhjetor e vitit 2019.

Rritja e fataliteteve duket të jetë e lidhur ngushtë me virusin COVID-19, i cili vijon të jetë aktiv në popullatë. Sa i përket qarqeve, rritjen më të ndjeshme krahasuar me vitin paraardhës e regjistrojnë: Lezha, Elbasani dhe Tirana, ku vihet re një rritje me mbi 30%. Dibra dhe Vlora nga ana tjetër, regjistrojnë rritjen më të vogël.

Ajo që bie tjetër në sy nga shifrat është edhe numri i lindjeve, në rënie të ndjeshme gjatë vitit të kaluar, me 1.7% në terma vjetorë, dhe e përhapur thuajse në çdo qark të republikës përveç Tiranës, Shkodrës e Lezhës. Në shifra, gjatë tremujorit të katërt 2020 lindën 7 011 beve, ose 900 fëmijë më pak se në tremujorin e katërt 2019.

Rritja e ndjeshme e vdekjeve dhe ngadalësimi i lindjeve ka bërë që shtesa natyrore në vendin tonë të shkojë pranë vlerave negative.