Lufta në Ukrainë, OKB zbulon numrin total të viktimave civile

Zyra e Kombeve të Bashkuara për të drejtat e njeriut ka bërë me dije se numri i vdekjeve të civilëve në Ukrainë që nga fillimi i pushtimit rus është rritur në mbi 10 mijë.

Sipas mediave të huaja që citojnë burimet e OKB-së, shumica dërrmuese e vdekjeve janë shkaktuar nga armë shpërthyese me ndikim në një zonë të gjerë si predha, raketa dhe municione thërrmuese.

Po ashtu OKB thotë se rreth gjysma e vdekjeve të fundit kanë qenë shumë prapa vijës së frontit, pjesërisht për shkak se forcat ruse kanë përdorur raketa me rreze të gjatë.

Vdekje janë shkaktuar edhe nga municionet e braktisura, të cilat kanë shpërthyer.

Misioni i OKB-së për të drejtat e njeriut, i cili ka dhjetëra vëzhgues në Ukrainë, tha se pret që numri përfundimtar i të vdekurve të jetë “dukshëm më i lartë”.

Danielle Bell, e cila kryeson misionin e monitorimit, tha: “Dhjetë mijë vdekje të civilëve është një moment historik i zymtë për Ukrainën”.

“Lufta e Federatës Ruse kundër Ukrainës, që tani hyn në muajin e saj të 21-të, rrezikon të evoluojë në një konflikt të zgjatur, me koston e rëndë njerëzore që është e dhimbshme për t’u kuptuar”, shtoi ajo.

Moska mohon të ketë shënjestruar qëllimisht civilët gjatë luftimeve në Ukrainë.

LEXONI GJITHASHTU:

• Rusia rikthen sulmet ndaj qytetit kyç në Ukrainë, viktima e të plagosur
• Ministri gjerman: BE nuk do të furnizojë Ukrainën me 1 milion predha