Mbërrijnë 8190 dozat e vaksinës “Pfizer”, Rama: Të vaksinuarit s’kanë shfaqur shqetësime

Në Aeroportin Ndërkombëtar të Rinasit kanë mbërritur 8190 doza të vaksinës anti-Covid nga kompania “Pfizer”. Kryeministri Rama i shoqëruar nga ministrat Ahmetaj dhe Manastirliu tha në një komunikim me gazetarët se po punohet maksimalisht, që të sigurohen dozat e nevojshme e vaksinave për t’iu ardhur në ndihmë qytetarëve.

Shefi i qeverisë pohoi se plani ambicioz është që procesi i vaksinimit të përfundojë brenda 14 muajsh.

“Vazhdojmë çdo ditë përpjekjen për të finalizuar një marrëveshje të rëndësishme me një shtet mik për një sasi prej 360 mijë dozash të AstraZeneca. Po ashtu jemi në komunikim dhe me 2 shtete të tjera, që të shtojmë sasinë e vaksinave në mënyrë, që të mos kemi asnjë moment ndalim apo rënie të tempit që të rrisim tempin progresivisht që të vaksinojmë popullatën brenda 14 muajve”, tha Rama.

Sipas z. Rama, në Shqipëri nuk është raportuar asnjë rast që ka shfaqur probleme anësore pasi ka marrë vaksinën anti-Covid.

“Nuk kemi pasur asnjë rast të asnjë lloj shqetësimi për të gjithë personat e vaksinuar, dhe nga eksperienca ime personale antitrupat zhvillohen në mënyrë shumë mbresëlënëse si rezultat i vaksinimit”, theksoi ai.