40 mijë euro për vrasjen, i forti i ‘Myslym Shyrit’ i shpëtoi drejtësisë disa herë

Për vrasjen e Gjon Menës me eksploziv të telekomanduar paraditen e 9 shkurtit në Kamëz ishin premtuar 40 mijë euro.

Hetimet e policisë së Tiranës deri në finalizimin e operacionit të koduar “Sateliti” zbuluan se pas tentativës së dështuar të eliminimit fizik të 35-vjeçarit fshihej një emër i njohur për uniformat blu dhe drejtësinë.

Bëhet fjalë për Gjegj Cukalin, i njohur si i forti i rrugës ‘Myslym Shyri’ i arrestuar disa herë për vepra të rënda penale si vrasje, rrëmbim e trafik droge.

Sipas burimeve nga sektori i krimeve të rënda në policinë e Tiranës, Cukali kishte kontraktuar 2 kushërinjtë Enver dhe Edmond Jakimi kundrejt pagesës prej 40 mijë eurosh për vendosjen e tritolit në automjetin e Gjon Menës, ku ky i fundit shpëtoi me vetëm disa dëmtime në njërën këmbë.

Megjithatë, hetuesit thonë se ka dyshime që edhe vetë Cukali të jetë paguar për organizimin e atentatit ndërsa 42-vjeçari në vitin 2019 u arrestua si vrasës i ish-policit Arben Bilali, por u lirua nga Gjykata e Apelit me argumentin se kampioni i ADN-së nga ku u provua autorësia nuk ishte marrë konform procedurave.

Gjergj Cukali ishte një nga emrat që u skedua edhe nga OFL-ja, ndërsa në vitin 2016 u arrestua në Tiranë si pjesë e një rrjeti të shpërndarjes së kokainës, por pas pak kohësh u lirua nga qelia.